Agar Mein Panchi Hoti Toh Kitna Achcha Hota

Agar mein panchi hoti

Toh kitna achcha hota,

Puri dharti apni lagti

Khula aasmaan nyaara lagta..

Ud jaati pankh khol apne

Kshitij chum jaati aur poore hote mere sapne..

Agar mein panchi hoti

Toh kitna achcha hota.....

Agar mein nadi hoti

Toh kitna achcha hota,

Beh jaati apne sapnon ke duniya mein

Phir bhi rastaa mera hota..

Phatharon se takraati, pahaadon se girti

Par mein needar ho kar aage badhti;

Intezaar kar raha hai Saagar mera

Mein awashya uske saath jaa kar milti..

Agar mein nadi hoti

Toh kitna achcha hota.....

Agar mein varsha hoti

Toh kitna achcha hota,

Idhar baras jaati, udhar garaj jaati

Par apne sang khushiyaali laati..

Rok paaye mujhe na aandhi na toofan

Ghusse se garjoongi

Dharti ko meri zaroorat hai

Jamkar nischay mein barsoongi..

Agar mein varsha hoti

Toh kitna achcha hota.....

Agar mein ek ped hoti

Toh kitna achcha hota,

Upar badey badey phal lagte

Niche aadmi sukun se sota..

Sabki sahaayata mein zaroor karti

Mann chaahe toh khaa le mere aam

ya jala de meri deh aur paa le sukh kisi ek shaam..

Agar mein ek ped hoti

toh kitna achcha hota.....

Lekin mein hoon ek aam manushya

Hain mere hazaaron sapne

Na taakat hai meri nadi jaisi

Na saahas hai mere ped jaise..

Chaahiye toh mujhe sirf ek cheez

har kadam pe ho saath mere apne.....

Agar mein panchi hoti

Toh kitna achcha hota.........